Fantasia

Pigliammoce sta vita cumme vene,

llassammo for' 'a porta 'a pucundria,

mparammece a campà c' 'a fantasia:

nce sta cosa cchiù bella pè campà ?'

A fantasia se sceta ogne matina,

comme si fosse prencepe rignante,

affonna 'e mane aperte int' 'e brillante

e non s' 'e ppiglia : che s' 'e ppiglia a ffà ?

E che curredo tene! Nu mantiello

ca luce cchiù d' 'o sole e nun è d'oro;

quanno se mena ncuollo stu tesoro

abbaglia 'a vista :nun se può guardà.

Po tene nu relogio cumpiacente,

cu sissanta minute d'allegria,

mmiez' 'o quarante liegge : FANTASIA

e fa tà-tì, tà-tì, nun fa tì-tà...

Eduardo De Filippo